Ақмола облысының Әдебиет және өнер музейі тек қана кәсіби суретшілердің шығармашылығын ғана емес, сонымен қатар жас өспірімдер мен балалар шығармашылығын да барынша насихаттап келеді. 2025 жылдың 9 қаңтары күні Әдебиет және өнер музейінде Көкшетау Балалар көркемсурет мектебі оқушыларының "Шабытты балалық шақ" атты шығармашылық көрмесінің ашылуы осының айғағы болса керек. Көрмеге түрлі тақырыптағы суреттер мен қуыршақтар қойылды.

Биыл Көкшетау қаласының Балалар көркемсурет мектебі өзінің 45 жылдығын атап өтті. Қазіргі уақытта мектепте 350-ден астам оқушы оқиды. Көркемсурет мектебі кәсіптік білім берудің бастапқы кезеңі болып саналады. Осы жылдар ішінде балалар өнер мектебін 2000-нан астам оқушы бітірді.

Көрменің ашылу рәсімінде Ақмола облысы мәдениет басқармасының басшысы Айгүл Сәбитова, Қазақстан Республикасы Суретшілер одағының Ақмола облыстық филиалының төрағасы, суретші, мүсінші Юрий Попов, Балалар көркемсурет мектебінің директоры  Юлия Желобкова, Әдебиет және өнер музейінің директоры Нұрбек Нұралы сөз сөйлеп балғын суретшілерге өнер жолында сәт сапар тілеп, көрмеге қатысқандары үшін арнайы алғыс хат табыс етті. Іс-шараға қатысқан ата-аналар музей ұжымына алғыс білдіріп, шығармашылық табыс тіледі.