2025 жылдың 12 ақпан күні Әдебиет және өнер музейін де Ақан сері атындағы жоғары мәдениет колледжінің 70 жылдығы мен жұмысшы мамандықтар жылы аясында, аталмыш оқу орнының «Киім дизайны» және «Интерьер дизайны» мамандығында білім алушы студенттердің «Еңбекпен өрілген өнер» атты шығармашылық көрмесінің ашылу салтанаты өткізілді.
Мемлекет басшысы Қасым-Жомарт Кемелұлы Тоқаев, ағымдағы жылды «Жұмысшы мамандықтары жылы» деп жариялағаны баршамызға мәлім. Ел Президенті өз сөзінде: «Біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз. Біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады», – деп баса айтты. Сол себепті, «Жұмысшы мамандықтар жылын» ылайықты атап өту баршамызға міндет. Мұражайда өткен іс-шара соның бір парасы. Сондай-ақ, Көрменің беташар сөзін Әдебиет және өнер музейінің директоры Нұрбек Жамашұлы сөйлесе, өз кезегінде Ақан сері атындағы жоғары мәдениет колледжінің директоры Саян Мұхамедияров ұйымдастырушыларға алғысын білдіріп, өнерпаз студенттердің шығармашылығына табыс тіледі. Оның айтуынша, мұндай шаралар жас буынның шабытып үдетіп, сүйікті ісімен белсенді айналысуына жол ашады. Жалғасты, дизайн бөлімінің меңгерушісі Ұлболсын Сағындықызы мамандыққа 22 жыл толғанын айтып, бүгінгі көрме содан бері сабақтасып жатқан өнердің көрінісі екеніне тоқталды. Оған қоса, ҚР Суретшілер одағының мүшесі Ұлболсын Ахметова құттықтау сөз сөйлеп, болашақ суретшілердің осы студенттерден шығатынын атап өтті.
Сонымен бірге, шара барысында колледжінің өнерлі жастары Ақан серінің әндерін айтып, қазақ күйлерін попури орындап кештің көркін қыздырып, көптің қошеметіне бөленді. Айта кетейік, биылғы жылы бүгінгі күнге дейін көптеген өнер майталмандарын, жұмысшы мамандықтарын тәрбиелеп шығарған Ақан сері атындағы жоғары мәдениет колледжі құрылғанына биыл 70 жыл толып отыр.
