2025 жылдың 18 ақпан күні Әдебиет және өнер музейінде ақын, жазушы, ғалым, PhD Ерболат Баятұлының шығармашылық тұлғасына арнап шығарылған «Тал түске тарту» атты жаңа кітаптың тұсаукесер рәсімі өтті.
Жиынға «Қалалық ақпараттық кітапхана» жүйесінің директоры, ақын, журналист Серік Жетпісқалиев модераторлық етсе, шараның алғы сөзін қоғам және мемлекет қайраткері, жазушы Жабал Ерғалиев сөйледі. Ал, кітап лентасын Жабал Ерғалиұлы, Әдебиет және өнер мұражайының директоры Нұрбек Нұралин және Жанат әулетінің атынан Баят ақсақалдың қарындасы Сәулеш Жанатқызы, М.Жұмабаев атындағы облыстық кітапхана директоры Қуаныш Оспановтар кесіп, Сәулеш Жанатқызы шашуын шашып, ақ жарма тілегі мен алғысын білдірді. Сондай-ақ, іс-шара барысында белгілі композитор, ҚР Құрметті мәдениет қайраткері, әнші Төкен Ілияс, Шоқан Уәлиханов атындағы Көкшетау универсиетінің аға оқытушылары, филология ғылымының кандитаттары Сәбит Жәмбек, Раушан Қияқова, Қасиет Молгаждаров, Дәулет Шаяхимов қатарлы рухани сала өкілдері сөз сөйлеп, Ерболат Баяттың адамгершілік және шығармашылық, еңбеккерлік тұлғасының қырларына байланысты естеліктер мен лебіздерін ортаға салды. Оған қоса, Қуаныш Ерғалиұлының арнау өлеңі, Үкілі Ыбырай атындағы Ақмола облыстық филормниясының әншісі Өмірзақ Шешқанның орындаған әндері, Шоқан Уәлиханов атындағы Көкшетау универсиетінің «Қазақ тілі мен әдебиеті» кафедрасы студенттерінің Ерболат шығармашылығынан оқыған өлеңдері кештің көркің қыздырып, өткізілу деңгейін арттыра түсті.
Айта кетейік, оқырманға жол тартқан жаңа еңбек Ерболат Баяттың асқаралы алпыс жасына арналып, ағайын-туыстарының ұйымдастыруымен баспадан шыққан. Жоғарыда айтып өткеніміздей, аталмыш кітапта кеш иесінің тұлғалық бейнесі, азаматтық болмысы, шығармашылық әлемі айшықтанып, кең көрініс тапқан.
