2026 жылдың 10 маусымы күні ТМД елдерінің кеден қызметтері басшылары мен Еуразиялық экономикалық одаққа мүше мемлекеттердің Біріккен кеден алқасының қатысушылары Бурабай баурайындағы Этноауылды тамашалады.

    Әдебиет және өнер музейі қызметкерлері іс-шараға қатысушылар назарына қолөнер шеберлерінің жұмыстарын ұсынып, музей жәдігерлерінен көрме ұйымдастырды.

    Көрмеге музей қорындағы қазақ халқының тұрмыс-тіршілігінен, қолөнерінен, этнографиясынан мол мағлұмат беретін жәдігерлер қойылды.

    Көрме барысында қонақтар қазақ халқының дәстүрлі мәдениеті мен рухани мұрасын танытатын бірегей экспонаттармен танысып, олардың тарихи және мәдени маңызы туралы жан-жақты мәлімет алды. Музей қызметкерлері әрбір жәдігердің шығу тарихына тоқталып, олардың қазақ халқының тұрмыс-салты, ұлттық дүниетанымы мен қолөнер дәстүріндегі орны жөнінде кеңінен ақпарат берді.

     Іс-шара қонақтары көрмеге қойылған ұлттық бұйымдар мен қолөнер туындыларына ерекше қызығушылық танытып, қазақ халқының бай мәдени мұрасы мен ұлттық құндылықтарына жоғары баға берді. Мұндай көрмелердің халықаралық деңгейдегі іс-шаралар аясында ұйымдастырылуы Қазақстанның тарихи-мәдени мұрасын насихаттауға, ұлттық өнерді дәріптеуге және мәдени байланыстарды нығайтуға ықпал етті.