2024 жылдың  24 қаңтарында Әдебиет және өнер музейінде әнші-композитор, ақын Біржан сал Қожағұлұлының туғанына 190 жыл толуына орай   «Баласы Қожағұлдың Біржан салмын...» атты әдеби-сазды кеш болып өтті.

2023 жылғы 13 желтоқсан күні Ақмола облыстық Әдебиет және өнер музейінде қала мектептері оқушылары арасында жыл сайын дәстүрлі түрде өтетін қазақ әдебиеті мен тілі білімі ғылымының негізін қалаушы, Алаштың рухани көсемі Ахмет Байтұрсынов атындағы «Алаштың ардақтысы – асыл Ахаң» атты мысал оқушылар сайысы мәресіне жетті. Биыл қала мектептерінен 50-ге жуық үміткер сайысқа қатысуға тілек білдірген еді. Олардың арасынан іріктеліп шыққан 10 жүйрік, байқаудың қорытынды кезеңіне жолдама алды. Бұл іс-шараның басты мақсаты: оқушыларды музейге тарту, Ахмет Байтұрсынұлының өмірі мен шығармашылығын насихаттау болатын.

2023 жылдың 7 желтоқсаны күні ҚР Ұлттық музейінде Материалдық емес мәдени мұра элементтерінің ұлттық тізбесін жүргізу жөніндегі секциялық отырыс болып өтті. Ақмола облыстық Әдебиет және өнер музейі аталған тізімге екі элемент ұсынып, көпшілікті "Сал-серілік дәстүрдің саңлақтары" көрмесімен таныстырды.

2023 жылдың 26 қарашасы мен 1 желтоқсаны аралығында Астана қаласында мәдениет қызметкерлерінің дәстүрлі «Рухани қазына-2023» фестивалі өтті. Фестивальге музей ісі, кітапхана саласы және халық шығармашылығы орталықтары қатысты. Бұл іс-шарада Ақмола облыстық Әдебиет және өнер музейі қызметкерлері екі номинация бойынша сайысқа түскен болатын. «Облыстық маңызы бар үздік музей» және «Облыстық маңызы бар музейдің үздік қызметкері» аталымдарында бақ сынаған музей ұжымы табыспен оралды. Музейдің ғылыми қызметкері Бақытбек Бекмұратұлы «Облыстық маңызы бар музейдің үздік қызметкері» номинациясында жеңімпаз атанып, жұмыстары қазылар алқасының жоғары бағасына ие болды.

 Биыл қазақ ән өнерінің Құлагері, әнші-сазгер Ақан сері Қорамсаұлының туғанына 180 жыл толып отыр. Осы мерейтойға орай Ақмола облысы мәдениет басқармасының Әдебиет және өнер музейі 2023 жылғы қарашаның 23-інде «Ақан сері Қорамсаұлының әдеби және музыкалық мұрасы» тақырыбына ғылыми-теориялық конференция ұйымдастырды.

Биыл жерлесіміз – қарымды қаламгер, айтулы ақын, ойы ұшқыр журналист, аудармашы Қорғанбек Аманжол мерейлі 70 жасқа толып отыр. Осы мерейтойды атап өту мақсатында 2023 жылдың 8 қарашасында, ақыннның нақты туған күнінде Ақмола облысының Әдебиет және өнер музейі «Қаламұшын қалың ойға батырып...» атты әдеби-сазды кеш ұйымдастырған болатын.