2024 жылдың 26 қыркүйегінде, Әдебиет және өнер музейінде жергілікті суретшілердің шығармашылығын насихаттау мақсатында суретші Елена Омельченконың «Осенний вернисаж» атты жеке көрмесінің ашылуы болып өтті. Көрмеге қылқалам шеберінің соңғы жылдары салынған еңбектері қойылды.
Астана қаласында өткен V дүниежүзілік көшпенділер ойындарының мәдени-көпшілік іс-шараларына қатысу үшін Әдебиет және өнер музейінің ұжымы 2024 жылдың 2-13 қыркүйегі аралығында іссапарда болды. Көшпенділер ойындарының қонақтарына арнайы жасалған этноауылда Қазақстанның әр аймағынан келген өнер ұжымдары ұлттық салт-дәстүр, жол-жоралғы үлгілерінен театрландырылған көрініс қойды. Әдебиет және өнер музейі Ш.Құсайынов атындағы қазақ драма театрымен бірлесіп көпшілікке «бесікке салу», «бата беру» салтын көрсетті. Музей ұжымы жабдықтаған он екі қанат ақ орда өзінің бай жәдігерімен, мазмұнды көрмесімен ерекшеленіп, қонақтардың таңданысын тудырды.
2024 жылдың 8 тамызы күні Әдебиет және өнер музейінде Мемлекеттік кірістер органдарының 10 жылдық меретойына арналған «Мемлекеттік кірістер органдары объективте» атты фотокөрменің ашылуы болып өтті. Іс-шара мақсаты мемлекеттік кірістер органдары қызметкерінің оң имиджін қалыптастыру және насихаттау, мемлекеттік кірістер қызметкерлерін мысалға ала отырып, жастарды ерінбей еңбек етуге шақыру болып табылды. Көрмеге Ақмола облыстық Мемлекеттік кірістер органдары қызметкерлерінің осы салада атқарып жатқан жұмыстарынан көрініс беретін әр тақырыптағы 30-ға тарта фотосуреттер қойылды.
2024 жылдың 28 тамызы күні Әдебиет және өнер музейінде «Гранат» шығармашылық студиясы оқушыларының 2023-2024 оқу жылының қорытындысына арналған шығармашылық көрмесінің ашылу болып өтті. Көрмеге студиясы оқушыларының 30-ға тарта жұмыстары қойылды.
Маусым айының үшінші жексенбісі – «Әкелер күні» болып белгіленген. Мерекелік күндердің тізбесіне «Әкелер күні» мерекесін енгізу –Қазақстандағы отбасылық құндылықтарды ілгерілетуге, отбасы институтын нығайтуға, сондай-ақ әкелер институтын дамытуға ықпал етеді. Осы күнді мерекелеу аясында, 2024 жылдың 13 маусымы күні Әдебиет және өнер музейінде филолог-ғалым, әдебиет сыншысы, Ш.Уәлиханов университетінің оқытушысы Аян Қажыбаймен «Әке – асқар тау» атты кездесу болып өтті.